Хрватскиот првак ППД Загреб си ја компликува ситуацијата околу пласманот на Ф4 турнирот во СЕХА Газпром лигата откако загуби на гостувањето кај Металург, 22-25.

За Металург ова е само четврта победа сезонава во СЕХА. ППД Загреб останува на четвртото место на табелата со 28 бода, но треба да одигра уште четири натпревари до крајот на регуларниот дел од сезоната.

Фаворитот на натпреварот само во првото полувреме имаше резултат и игра што му одговараа, а потоа целата контрола ја преземаа домаќините. Металург од 18 минута играше и без пивотменот Жарко Пешевски кој доби директен црвен картон.

ППД Загреб играше без неколку стандардни ракометари, кои веројатно ги чуваше за следниот дуел во Скопје, во сабота против Вардар во рамките од ЕХФ лигата на шампионите.

Пресвртот во играта се случи откако голманот Мартин Томовски влезе во игра пред крајот на првото полувреме. Одбрани повеќе важни топки, а особено во вториот дел кога Металург избега на 19-14. Томовски имаше 15 успешни одбрани на мечот. ППД Загреб успеа единствено да намали на минус два гола, но не и да направи пресврт.

Лино Червар, тренер на Металург:

Ја искористивме шансата што ја имавме. Драго ми е за моите ракометари кои извојуваа голема победа. Ја искористивме добрата игра седум на шест, а имавме и малку среќа со одличниот Мартин Томовски на голот. Бевме посигурни во нападот. Но, како и да е, мора да го заборавиме овој меч, да се фокусираме на Чеховски медведи.

Мартин Томовски, голман на Металург:

Лошо го отворивме натпреварот. Грешевме, но потоа се консолидиравме и успеавме да играме поцврсто во одбраната. Со мојата помош и головите во нападот, направивме разлика која ја одржувавме до самиот крај.

Силвио Ивандија, тренер на ППД Загреб:

Честитки до Металург и Лино Червар кој врвно го постави овој меч тактички. Доста проблеми ни направи на моменти, и не реагиравме кога имавме шанса. Мечот ни донесе проблеми, останавме без Хорват, Чингесар и Шебетиќ и Jотиќ. Двајца од нив имаа висока температура, а другите се повредија на тренинг. Тоа не исфрли од ритам, но не е оправдување. Металург беше одличен. Нападот ни беше на ниско ниво. Ако тоа го поправиме, ќе имаме шанси на наредниот меч во ЛШ.

Добривоје Марковиќ, играч на ППД Загреб:

Одигравме тежок меч по паузата и ова е заслужена победа на Металург. Почнавме да грешиме потоа и правевме глупости, а нивниот голман почна добро да брани. Се обидовме да ја стигнеме разликата, но промашувавме зицери и не успеавме во посакуваното.