Дуелот во Загреб во недела (17,30 ч.) не е само меч меѓу два тима од СЕХА лигата, туку и пресметка на двата досегашни победници на оваа лига, на екипите кои беа меѓу најголемите заговорници за создавање на ваква Регионална лига, Вардар и Загреб. Без оглед на доброто клупско пријателство на терен секој сака да остане непоразен.

Вардар во првата сезона на СЕХА лигата успеа од аутсајдер да стане шампион и тоа во Загреб, победувајќи го хрватскиот тим уште во полуфиналето на Ф4. Загрепчани вратија со иста мерка пролетва, кога во Скопје триумфираа на Ф4 турнирот. Тогаш во финалето, Загреб и Вардар играа продолженија, а победи Загреб со 25-24.

Сега е време за првата меѓусебна проверка.

- Лани како гости земавме бод, во Скопје ги победивме. На Ф4 турнирот во финалето имаше продолженија. Сега Загреб следи еден тренд на подмладување, и тоа ми се допаѓа. Имаа добри лев и десен бек кои според мене можат да играат во најсилните лиги во Европа, среден бек, Валчиќ кој долго е со екипата, искусни и добри крила, и гледано во целина, сосема добар "пакет на играчи", вели Немања Прибак, средниот бек на скопјани, кој и лани беше дел од екипата што играше во финалето на Ф4 турнирот.

И покрај тоа што е тоа дерби и прогласен за меч на "великани", во таборот на скопјани нема преголем притисок.

- Ние мечот го сфаќаме како и секој нормален, па така и сега играме за победа. Се подготвуваме тактички. Можеме и нешто од играта на Веспрем да украдеме, бидејќи лесно победија во Загреб во ЛШ. Но, никој не победил лесно во Загреб, и секој што така помислил не одиграл добро, вели Прибак

Секоја екипа има свои добри и лоши страни. Најважно е како ќе се искористи сопствениот потенцијал, а сопре ривалскиот квалитет.

- Наша добра страна е ротацијата, имаме по 2 добри играчи на секоја позиција. Тука е нашата шанса, и тоа во последно време доста го користиме. Загреб е добро воигран во развивање на полуконтра и брз центар. Имаат посилни бекови, мислам на шутери кои упатуваат шут од 10-12 метри. Тоа е млада екипа, која многу трча, вели Прибак

Таквата игра што Загреб сега ја форсира на Вардар многу и не му одговара.

- Не ни одговара таква игра, но со таа ротација на играчи можеме да се прилагодиме на се. Имаме и ние свои шанси и нема да се откажеме.

Очигледен е напредокот во играта на сите екипи во СЕХА. Проектот на Регионална лига станува се подобар,а тоа го признаваа сите и го докажуваат резултатите.

- Мене повеќе ми одговара ваков начин на играње, секоја недела по еден силен натпревар. И на сите им одговара оваа лига,за подобро подготвување, и за СЕХА и за ЛШ. Овие силни мечеви се подобра опција отколку да се игра против некој послаб тим, па потоа ЛШ. Треба да ја сфатиме таа лига сериозно, мора да живее, бидејќи на овие простори ракометот не е на големо ниво за да играме сами сопствена лига.

Вардар сезонава донесе многу засилувања. Има ли притисок дека мора да се освојат што повеќе трофеи?

- Искрено, притисокот е помал од лани. Во смисла дека нешто мора. Не е тоа приоритет, но треба да освоиме трофеи, тоа е нормално. И сега играме на победа, но ни е оставен простор за воигрување, и тоа е добро за нас. Оваа сезона имаме повеќе простор за тоа, смета Прибак.

Ако Вардар и Загреб се фаворити, остануваат уште две места за Ф4?

- Вардар го гледам како освојувач, а на турнирот би играле според мене и Загреб, Металург и Татран, ако биде Ф4. Ако биде Ф6 тогаш има место и за Мешков, која е добра екипа, но лошо игра.