Металург нема време за плачење, па само неколку дена откако загубија во градското дерби од Вардар во Лигата на шампионите, им следува меч за рехабилитација и враќање на самодовербата.

Во вторник во Скопје (17,45 "Борис Трајковски") гостува Ловќен во рамките од СЕХА лигата, на кој македонскиот вице првак повторно ќе им даде шанса на оние што помалку играат, некои играчи ќе одмораат, а се ќе биде со единствена цел што подобро да се подготват за реваншот во недела повторно со Вардар.

Црногорскиот тим доаѓа во Скопје без илузии дека може да го изненади Металург, без разлика со кој состав домаќините ќе играат.

- Натпреварот со Ловќен претставува добар тест за нас и се вклопува во подготовките за реваншот против Вардар в недела во Лигата на шампионите. Ловќен е засилен со неколкумина нови играчи по лошиот старт во СЕХА лигата и сигурно нема да ни биде лесно да стигнеме до позитивен резултат, изјави Червар.

Без разлика на ваквата изјава на Червар, сигурно е дека Металург ќе тргне силно од самиот почеток, ќе сака да покаже дека се доволно силни да заборават на она што поминало, и поподготвени да го дочекаат следниот меч.

Меѓу дилемите што ги има Червар околу составот на тимот се дали ќе може Ренато Вугринец да игра, бидејќи има болки во грбот, и колку ќе бид еподготвен Ацо Јоноски, со оглед на повредата на лактот на раката. Најмалку 2-3 играчи ќе добијат време за одмор и за освежување за неделниот дуел.

- Нема време за плачење. Ќе играат оние што досега помалку играа. Кој се ќе биде ослободен од овој меч ќе знам по последниот тренинг. Ќе испробаме некои нови варијанти во играта, ќе се подготвуваме за дуелот со Вардар, вели Лино Червар.

Металург е на четвртото место на табелата со 14 бода (од 7 натпревари), пет помалку од Вардар кој има 19 бода. Ловќен досега собра само 7 бода од девет меча, а на претходното гостување во Скопје беше поразен со 36-19 од Вардар.