За двата тима, Вардар и Мешков, мечот в сабота во Скопје (17,45 СРЦ Кале) ќе биде клучно. На македонскиот првак му требаат бодови за да остане во врвот од табелата, веднаш зад Татран и Загреб, а Белорускиот тим очајно се бори да фати приклучок за место што води на Ф4 турнирот.

Лани Мешков и Вардар играа на Ф4 турнирот во Скопје, и иако тргна како лидер, Мешков не успеа да се пласира во финалето. Сезонава гостите од Брест имаа потежок распоред, поради настапот во ЕХФ купот, и нема место за поправен. Само победа ќе ги залечи раните од елиминацијата во ЕХФ купот.

Моментно Вардар е трет на табелата во СЕХА лигата со 22 бода од 10 меча (има уште два за играње во декември), а Мешков е петти со 15 бода од седум меча (има уште три меча за играње во декември). Секој кикс на некои од овие натпревари ќе значи чекор поназад од Ф4 турнирот за Мешков.

Вардар е задоволен од досегашните резултати во СЕХА лигата и во ЕХФ купот, надевајќи се дека годината ќе ја завршат со уште две победи, една против Мешков, а другата против Металург на 17 декември.

Во сабота Словенецот Миладин Козлина ќе дебитира за Вардар на позицијата лев бек. Тој потпиша договор со клубот минатиот месец но продолжи со рехабилитација поради операцијата на неговото рамо. Неизвесно е колку Козлина ќе може да игра, но тренерот Андон Бошковски потврди дека ќе му даде шанса најмалку неколку минути на мечот.

- Нашиот следен противник е еден од најдобрите во лигата, со слични квалитети како и Загреб, Татран и Металург. Имаат добар тренер, и состав од доста интернационалци, никогаш не се предаваат, и како што кажав се многу блиску до нашиот квалитет. Но, ние сме одлично подготвени, речиси во комплетен состав и ќе играме против нив со нашиот најдобар состав во моментов, вели Андон Бошковски, тренерот на Вардар.

Откако Вардар одигра одлични 45 минути против Барселона минатата недела во ЕХФ Лигата на шампионите, сите во клубот се уверени дека играчите ќе ги повторат истите игри.

- Овој меч против Мешков ќе биде многу тежок. Имаат добар тренер, и тим кој има квалитет да игра на Ф4 турнирот во СЕХА лигата, но ако нашите игри се исти како против Барселона, силно во одбрана, верувам дека ќе победиме, велиАлекс Душебаев, дешсниот бек на Вардар.

Мешков ја почна неговата тура во Белград каде го победи Партизан, и во Скопје доаѓа со амбиции за одмазда. На првиот меѓусебен дуел со Белорусија, Вардар победи со 27-23. Натпреварот во Скопје ќе биде најтешкиот за Мешков на оваа турнеја, откако екипата беше елиминирана од ЕХФ купот, и сега тимот од Брест ќе се фокусира само на СЕХА ГСС лигата и домашното првенство.

Првата цел е да се стигне до Ф4 во СЕХА ГСС лигата. Но, за да се остане на вистинскиот пат, екипата мора да победи во Скопје и да остане блиску до врвот од табелата. Ако заминат од Скопје без бодови, тогаш Мешков ќе заостанува во однос на нивните желби.

- Отсекогаш сум имал добро претчувство тука, поради атмосферата. Ние сме во позиција во која сме, и секој меч сега е важен за нас. Од друга страна, секогаш е тешко да се игра против Вардар, но ќе сториме се што можеме за да победиме. Ќе се обидеме да ги искористиме нивните недостатоци, и мораме да одиграме на високо ниво за добар резултат, вели Жељко Бабиќ, тренерот на Мешков.

Во Скопје, двајца браќа ќе играат еден против друг. Иван Карачиќ игра во Мешков, а неговиот брат Игор е член на Вардар. Постариот, Иван очекува да види полна сала, да ја почувствува таа атмосфера.

- Немавме многу време да се подготвиме за Вардар, бидејќи игравме во ЕХФ купот против Берлин, па имавме само два дена за овој натпревар. Нашите тимови имаа слични квалитети, ќе дадеме се од себе да постигнеме добар резултат. Знам дека нема да биде лесно, но ќе биде тешко и за нив. Ја знам и публиката, тука е фантастично, бидејќи ги следам сите натпревари на Вардар, зашто тука игра мојот брат. Очекувам интересен меч пред полна сала, вели Иван Карачиќ.