Металург си ги зголеми шансите за пласман на фајналфорт турнирот во СЕХА лигата откако како гостин во салата "Борис Трајковски" го победи Вардар со 21-22 (8-10) и се зацврсти на четвртото место на табелата, бегајќи му четири бода на Мешков кој има и меч помалку од скопјани.

Колку што се радуваше Металург на триумфот, толку беше загрижен и селекторот на машката сениорска репрезентација Ивица Обрван. Не колку за лошата форма на некои репрезентативци, колку за повредата на Наумче Мојсовски во 51 минута.

Во напад бекот на Металург беше оттурнат од противничките играчи и при падот удри на подот со десното колено и врз него налета друг играч и остана да лежи со силни болки. Не помогна "првата помош" на теренот, па откако беше изнесен на раце од соиграчите и укажана неколку минутна помош, замина во болница на дополнителни прегледи.

 

Јунак на мечот беше голманот на Металург, Дарко Станиќ кој имаше 13 одбранети топки и три пенали, вклучувајќи го и решавачкиот удар на Немања Прибак во последната секунда од средбата.

Металург можеше за малку да направи од "готово - вересија) бидејќи во 53 минута имаше водство од 16-20, а во последната минута Вардар намали на 21-22. Остануваа 25 секунди за играње, но сините од Автокоманда немаа идеја и им беше одземена топката за пасивна игра. Атман спречи брза контра, за што доби црвен картон, а "црвено-црните" имаа четири секунди за напад, а ударот на Прибак го одбрани Станиќ.

Одбраните на Дарко Станиќ (8 плус 2 пенал) беа причината поради која гостите од Автокоманда има предност од два гола на полувреме. Играњето "гола за гол" беше одлика на поголемиот дел од првото полувреме. Во 25 минута Металург првпат имаше водство од два гола (8-6), но Вардар успеа да се врати и да израмни на 8-8. Наместо да го искористи играњето со играч плус по исклучувањето на Велко Марковски, домаќините немаа идеја како во нападот да ја пробијат противничката одбрана, а Миркуловски и Георгиевски ги искористија укажаните шанси за водство од 8-10.

Според најавите за промена на тренерската позиција, Андон Бошковски повеќе не ја води екипата, а на денешниот меч совети делеше Горан Симиќ досегашниот помошник и тренер на голманите во Вардар.

 

 

Лино Червар - тренер на Металург

Во девет дена одигравме три најсилни меча во СЕХА, две со Загреб и една со Вардар. Тоа е голем напор за нас, и ние заслужено победивме. Тажни сме за она што се случи. Оптимист сум, но се плашам за ситуацијата со Мојсовски. Тоа ќе се знае вечерва или утре. Но, неговата реакција многу кажува. Многу сум тажен и разочаран.

 

 

 

Филип Миркуловски - играч на Металург

Одигравме еден добар меч, со најголемиот ривал. Сакавме да завршиме со победа, тоа и го направивме. Овој меч нема да остане по добро сеќавање, не само по повредата на Мојсовски. На терен беше коректно. Ние сме репрезентативци, ни следи ЕП, па бараме малку коректност.

 

 

Горан Симиќ - тренер на Вардар

Ова е тежок меч кога се работи за два клуба во Македонија, туку пошироко. Победи Металург сосема заслужено. Жалам за повредата на Мојсовски. Сакам да им заблагодарам на моите играчи кои за малку не дојдоа до бод. Ќе се обидеме да ја подобриме играта и да бидеме на она ниво на кое и досега бевме.

 

Стојанче Стоилов - играч на Вардар

Многу тензија и борбеност, како и на секој досегашен натпревар. Жалам за Мојсовски, незнам за што се работи, но се надевам дека не е нешто сериозно.