Со одличната игра во второто полувреме, кога Малубрес ја "спушти ролетната", а нападот лесно ја пронаоѓаше патот до голот на Загреб, македонскиот ракометен првак Вардар триумфално,  33-24 (16-13) против Загреб го заврши регуларниот дел на сезоната во СЕХА лигата. Двете екипи повторно ќе играат меѓусебе во полуфиналето на СЕХА лигата на 11 април во Нови Сад.

Без разлика како ќе заврши дуелот меѓу Мешков и Партизан, на третото место на табелата останува Вардар, кој има две победи во дуелите со Мешков.

Досега на Ф4 турнирите, Вардар и Загреб играле двапати меѓусебе. На првиот турнир во Загреб, скопјани направија изненандување победувајќи го хрватскиот првак уште во полуфиналето, а лани во Скопје, дури во продолжението гостите од Хрватска победија и ја освоија титулата.

Загреб најави дека во Скопје ќе дојде со млади играчи кои ќе сакаат да се докажат, и во тоа успеаја. Не му беше лесно на Вардар да се одлепи резултатски и истото да го задржи иако во 14 минута "црвено-црните" имаа предност од 8-4 што беше највисокото водство на домаќините. Тоа беше во период кога гостите имаа исклучен играч, а вардарци го искористија максимално таквиот расплет на ситуацијата.

Оние што играа во тимот на Загреб не дозволија таа предност да се зголеми, па седум минути подоцна резултатот беше израмнет 10-10, и се влезе во нова резултатска неизвесност. За 3 минути од 25 до 28 минута со головите на Брумен и Карачиќ повторно предноста "скокна" на три гола, и така остана и до заминувањето во соблекувалните.

Во второто полувреме брзо се сменија работите во корист на Вардар. После седум минутои играње скопјани водеа со 19-14, а во 41 минута Вардар имаше предност од 20-14. Голманот Малубрес имаше добра партија со осум одбрани за 15 минути, токму во периодот кога се правеше разликата.

Во 50 минута разликата беше плус 10 за Вардар (26-16), кога веќе беше решено кој ќе биде победник. Двоцифрената предност можеби ќе останеше, но скопјани направија серија грешки, дозволувајќи му на Загреб да намали на 29-21. До крајот немаше шанси за пресврт, и остана само деве гола предност.

Раул Гонзалез, тренер на Вардар

- Одигравме добар меч. Не придававме голема важност, бидејќи знаевме дека сме квалификувани за Ф4 турнирот. Моето гледање на мечот е дека двете екипи можеа да играме пријателски натпревар, и да им дадеме шанса на сите, да искористиме некои замисли што може понатаму да се користат. Во еден дел моравме да одиграме посериозно, заради она што не чека следниот викенд со Хамбург. Имаме една недела за да миожеме да се спремиме, за да одиграме подобро со европскиот првак.

Игор Карачиќ, играч на Вардар

- Драго мие што овој меч го игравме добро, иако имавме проблеми, и паднавме во мала криза. Ова ни дојде како увертира, и би сакал да оствариме добар резултат. Ги ги пофалил играчите на Загреб, тие добро трчаа, но, ние бевме подобри.

Борис Дворшек, тренер на Загреб

- Денеска игравме со најдобрата екипа во СЕХА лига, според мене. Тие се главни фаворити за насловот на турнирот во Нови Сад. Им посакувам среќа во мечот од ЛШ. Ни недостасуваат играчи за ротација. Имавме проблеми со болеси и повреди. Имавме мечеви секој трет ден. Имавме и петмина сега во тимот што се жалеа на болки во стомакот. "Пукнавме" во второ полувреме, и токму на тој тркачки дел паднавме, немавме свежина, и останавме и без памет. Грешевме, а Вардар сето тоа го казни. Тој пораз не боли. Тоа се два освојувачи на СЕХА лига, и тој следен меч ќе биде сосема поинаков.

Јерко Матулиќ, играч на Загреб

- Вардар ја заслужи победа. Во првото полувреме се држевме, во второ ротацијата ја направи разликата, и Вардар тоа го искористи и победи. Ќе се спремиме за полуфиналето, па ќе се "потепаме" и кој ќе победи ќе видиме.