Ракометарите на Вардар се единствениот тим сезонава во СЕХА Газпром лигата кои што успеаја да му земат бодови на актуелниот првак Веспрем. Повторно на меѓусебниот дуел беше реми, овојпат 30-30 со што е познато дека двата тима нема да може да се сретнат во полуфиналето на Ф4 турнирот во Вараждин.

Ова беше последен натпревар за Вардар сезонава во СЕХА Газпром лигата пред домашна публика, па останува само уште гостувањето кај Мешков Брест кое секако нема ништо да смени во однос на двојките за полуфиналето на Ф4 турнирот.

Ривал во Вараждин во полуфиналето ќе биде ППД Загреб. Тие победија на натпреварот со Мешков и го избегнаа четвртото место.

Иако натпреварот во Скопје меѓу Вардар и Веспрем немаше голем притисок, сепак двата тима беа расположени за играње, надигрување и желни за победа. Неизвесноста беше присутна во текот на целиот натпревар, а во самата завршница преку Матјаж Брумен Вардар успеа да израмни на 30-30. Тоа веројатно е најреалниот исход од натпреварот, бидејќи ниту една екипа не успеа да оствари позначајна предност ниту пак да се одлепи резултатски.

Од почетокот на мечот на Вардар му требаа пет минути да "запали", а потоа направи серија од 6-1 и поведе со 7-5. Ја чуваше предноста, која достигна највисоки три разлика, а потоа исто така во пет минути ја загуби. Од 20. До 25. минута вардарци не успеаја да го најдат патот до голот, пред сѐ поради гранитниот Роланд Миклер на голот, па со серија од 5-1, Веспрем го презеде водството со 11-10 во 25. минута. Сепак, имаа нерви во завршните пет минути повторно да се вратат во позитива и со 13-12 да заминат на пауза.

Целото второ полувреме беше понапнато, подинамично, особено последните 10 минути. Во нив Вардар влезе со водство од 24-23, правејќи серија од 3-0. Но потоа Веспрем повторно возврати и дојде до 27-25 на шест минути до крајот. Меѓутоа вардарци беа упорни и решителни во нападот успевајќи да го урнат беспрекорниот Миклер денеска.

Хавиер Сабате - тренер на Веспрем

"Честитки за Вардар и за тренерот Раул Гонзалес. Беше одличен меч за сите гледачи во арената. За натпреварот, мислам дека во првото полувреме Вардар ја водеше играта, ние игравме бавно, губевме многу топки. Вардар има брзи играчи и брза контра, па го искористија тоа во првиот дел. Во второто полувреме бевме подобри во нападот, но на крајот тие играа многу добро. Беше идентичен меч како тој што го игравме дома. Честитки на сите играчи за борбата и честитки за сите навивачи кои дојдоа и го одлично го бодреа својот тим".

Раул Гонзалес - тренер на Вардар

"Сакам да ѝ честитам на екипата на Веспрем, зашто мислам дека одиграа многу добар меч. Јас сум многу задоволен зашто и ние одигравме добро. Во првите 15 минути бевме супер и во одбрана и во контра-напад. Но Веспрем има добри играчи и добра стртегија па беше тешко да задржи предноста. На полувреме беше еден разлика за нас, а потоа тешко се снаоѓавме со одбраната 6-0, па Веспрем поведуваше со два-три разлика. Потоа со 5-1 имавме повеќе можност за контра-напад и постигнавме полесно голови и на крај нерешено, секогаш е успех кога ќе одиграте нерешено со Веспрем".

Тимушун Шуц -  играч на Веспрем

"Почнавме бавно, заспано со многу грешки од почетокот на натпреварот дозволувавме контра-напад. Потоа бевме малку подобри во одбрана, а во вториот дел веќе го кренавме нивото и бевме подобри. На крајот натпреварот заврши рема и мораме да научиме по нешто од овој меч".

Стојанче Стоилов - играч на Вардар

"Да ја пофалам екипата на Веспрем за нивната борбеност. И двете екипи одигравме добри натпревари, но во првото полувреме ние бевме подобар противник и не успеавме тоа да го искористиме за поголема предност. Во вториот дел и ние и Веспрем имавме подеми и падови и двете екипи сакаа да победат и мислам дека нерешеното е реален резултат за овој натпревар".