Двата лански учесници на Ф4 турнирот во СЕХА Газпром лигата, Вардар и Мешков со дерби натпревар ја отвораат новата сезона. Екипите имаат амбиции и сезонава да играат на Ф4 турнирот и очекуваат триумф уште на првиот натпревар. Тоа би требало да биде гаранција за квалитетен и неизвесен натпревар.

На досегашните меѓусебни натпревари во СЕХА Газпром лигата поуспешен е Вардар кој има пет победи, а четири натпревари завршиле со триумф на тимот од Белорусија. Лани Мешков се радуваше на победата во Скопје, а во Белорусија беше обратно, победи Вардар.

Двете екипи уште најмалку трипати сезонава ќе играат меѓусебе бидејќи покрај натпреварите во СЕХА Газпром лигата ќе играат и во Б групата од ЕХФ лигата на шампионите. Вардар и Мешков веќе имаа "прв дуел" на Белгазпромбанк купот во Брест каде триумфираа домаќините со 29-26. Мешков доаѓа во Скопје и со трофеј од Кањижа купот во Србија каде го освои второто место.

Вардар сезонава ангажираше неколку нови играчи со цел да го засили тимот: Иван Чупиќ, Жоан Кањељас, Рожерио Оливеира, Вуко Борозан. Со екипата се и неколку млади ракометари од вториот тим кои би требало да добијат шанса на некои од натпреварите.

Кај Мешков нови ракометари се крилото Рајко Продановиќ, Владислав Остроушко, Раде Мијатовиќ и Иман Џамали. И неколку млади ракометари ќе добијат шанса з аиграње.

Раул Гонзалез, тренер на Вардар

Пред нас е нова сезона во СЕХА Газпром лигата која ќе биде најдобра досега во историјата на лигата. Имаме 7-8 екипи што ќе играат во ЕХФ лигата на шампионите и ова ќе биде навистина тешко натпреварување за да се стигне до Ф4. Вардар ги има истите амбиции како и досега да обезбеди место меѓу најдобрите четири екипи и потоа во Ф4 да се бори за титулата. Имаме неколку промени во тимот и ќе ни треба време за адаптирање на новите играчи на нашиот систем на играње, особено новите новите ракометари.

Мешков Брест е сериозен ривал, екипа која има раст последните сезони и е навистина голем тим. Имаат неколку добри ракометари како Џамали, Атман, Криштопанс, Рутенка и овој натпревар ќе биде навистина добар тест за мојот тим. Очекувам квалитетен натпревар и знам дека нашите навивачи ќе уживаат.

Cтојанче Стоилов, играч на Вардар

"Утре ја почнуваме новата сезона во СЕХА Газпром . Споредувајќи ја со ланската сезона, оваа ќе биде поинтересна зашто имаме и тимови од Словенија кои ќе бидат голем предизвик за да се стигне до Ф4 турнирот. Досега беше очигледно дека Вардар ќе игра на Ф4, но овојпат ниту еден тим не може тоа да го има загарантирано. Лично сметам дека СЕХА Газпром лигата е најдобрата лига во Европа, ако се исклучи ЕХФ лигата на шампионите. Ни во Шпанија ниту Германија неможете да најдете толку многу квалитетни екипи. Но, нашата цел е да се пласираме на Ф4 турнирот и да го донесеме дома трофејот по неколку години. Тоа значи дека утре на мечот со Мешков одиме на победа.

Сергеј Бебешко, тренер на Мешков

 

"Минатат недела веќе игравме против Вардар во натпревар пред сезоната на турнир во Брест и ние победивме со 29-26. Но, утрешниот натпревар во Скопје е нешто сосема друго. Тоа е прв официјален меч во новата сезона и овој натпревар секогаш е еден од најтешките. Нема да биде лесно зашто ова е наш четврти натпревар за пет дена. Верувам дека ќе успееме да се бориме против Вардар и да освоиме поени во главниот град на Македонија.

Вјачеслав Шуман, играч на Мешков

"Сакаме да ја почнеме сезоната со успех во СЕХА Газпром лигата. Но, истовремено знаеме дека ќе играме против силен тим кој покажа добри перформанси на Белгазпромбанк купот пред десет дена. На овој турнир мислам дека Вардар не ги покажа своите вистински квалитети. Утре, и Вардар и Мепков ќе се борат за победата.