Во реприза на последното финале на Ф4 турнирот од СЕХА Газпром лигата, Вардар утревечер (20,30 ч) во Скопје го пречекува актуелниот првак, Телеком Веспрем. Македонскиот тим гледаш шанса за реванш за ланскиот пораз во Вараждин, и конечно подобрување на играта.

Телеком Веспрем ќе одигра два натпревари во Скопје викендов, еден со Вардар и во недела со Металург. Понеизвесен би требало да биде утрешниот во СЦ "Јане Сандански" каде пред една сезона Унгарците веќе беа поразени.

Вардар е единствениот тим што во последниве две сезона откако и Телеком Веспрем е дел од СЕХА лигата, успеа да го победи унгарскиот првак, и уште двапати да освои бод, еднаш дури и во Веспрем.

Лани двете екипи одиграа три меѓусебни натпревари. Во регуларниот дел од сезоната, двапати беше нерешено, 24-24 и 30-30. Во финалето на Ф4 турнирот, Телеком Веспрем победи со 28-26. 

За овој натпревар единствената дилема за тренерот Раул Гонзалез е играњето на Хорхе Македа. Тој поради повреда ги пропушти дуелите со Мешков и Металург. Деновиве тренираше со екипата, и последните два тренинзи ќе покажат дали ќе биде подготвен за дербито со Телеком Веспрем. 

Раул Гонзалес, тренер на Вардар

Играме трето коло во СЕХА Газпром лигата против Веспрем, моќен тим, и тие според мене ја имаат најдобрата одбрана во свет, имаат крупни и умни играчи кои играат брзо, а исто така тука се големи имиња како Палмарсон, Чема, Наѓ. Тоа е силен состав кој ќе биде наш вистински испит. Ова ќе биде многу добар тест за нас, треба да се подготвиме добро ако сакаме повеќе. Јас имам доверба во момците. Не знам со каков состав ќе се појавиме утре поради повредите, Македа се уште не е подготвен 100 отсто, исто така имаме проблеми и со некои други ракометари кои ќе диктираат каков ќе биде утрешниот состав. 

Стојанче Стоилов - капитен на Вардар

Играме со наши стари должници. Минатата сезона изгубивме во финалето од нив. Првите две кола не беа нашето лице вистинско, затоа треба да се подобриме во одбрана и напад. Имаме тежок тест против Веспрем, една од најдобарата екипа во светот. Мораме да го прикажеме тоа што го тренинраме на теренот и да го дадеме својот максимум.

Хавиер Сабате - тренер на Телеком Веспрем

"Сезонава Вардар повторно е кандидат за учество на Ф4 турнирот на СЕХА Газпром лигата. Тие се еден од најдобрите тимови во Европа. Нивниот одличен тренер сега дури има и посилен тим од лани, и нивните повредени играчи се оздравени. Очекувам тежок натпревар. Ние веќе ја почнавме сезоната, иако почетокот на подготовките не беше така одамна. Тимот не е целосно подготвен, но сигурен сум дека навивачите ќе видат добра игра во домот на Вардар каде секогаш има фантастична атмосфера. 

Андреас Нилсен - играч на Телеком Веспрем

"Можеби ова ќе биде нашиот најтежок натпревар досега во сезоната. Во минатото сите наши натпревари против Вардар биле многу тешки. Сигурен сум дека и овојпат ќе биде така. Мораме добро да се подготвиме против нив доколку сакаме да ги освоиме трите бода. Нивниот тим стана уште посилен, но двата тима се на почеток од сезоната, и ниту еден тим не е во најдобрата форма. Се надевам ќе бидеме малку подобри од нив и во сабота ќе победиме.