Дерби натпреварите за Вардар во СЕХА Газпром лигата продолжуваат, и новиот ривал што ќе гостува во СЦ "Јане Сандански" е хрватскиот првак ППД Загреб, во меч закажан за утревечер во 17,45 часот.

Вардар и Загреб се стари познаници, бидејќи се во СЕХА Газпром лигата од самиот почеток. Меѓу себе одиграле вкупно 14 натпревари во досегашните пет сезони. На седум натпревари се радувал Вардар, а еден меч завршил со реми. Во мечевите од регуларниот дел од сезоната, од девет мечеви, четири завршиле во корист на "црвено-црните" и исто толку за Загреб.

Хрватскиот првак досега само еднаш успеал да победи во Скопје, и тоа во финалето на Ф4 турнирот во 2013 година по продолжение. Во регуларниот дел од сезоната секогаш во Скопје победувал Вардар.

Гостувањето на Загреб во Скопје секогаш е полно со емоции, бидејќи тренер на хрватскиот тим е Веселин Вујовиќ, поранешен тренер на Вардар кој е многу почитуван од вардаровите навивачи.

Вардар постојано ја подобрува својата форма, и има серија од две победи во три натпревари досега. Единствената промена во тимот на Вардар ќе биде не играњето на Илија Абутовиќ кој има повреда, па стручниот штаб реши да не се ризикува со неговиот настап. Во екипата на Загреб ќе ги нема Домагој Павловиќ и Лука Шебетиќ.

Хрватскиот тим одигра само еден натпревар сезонава, дома против Нексе што го доби со 28-22.

Минатата сезона во Скопје победи Вардар со 33-24, а во Загреб загубивме со 30-25.

Двата тима се и во истата група и во ЕХФ лигата на шампионите.

Раул Гонзалес - тренер на Вардар

"Одигравме добар натпревар против Веспрем, затоа треба да ја повториме таа игра и на утрешниот меч. Знаеме дека ќе биде тешко против Загреб, бидејќи тие има добар тренер и играчи, ја користат секоја грешка и имаат брз контра-напад. Очекувам добар ракомет, денес ќе го одработиме последниот тренинг по што ќе знаеме кој ќе биде составот кој ќе истрча на теренот во вторник"

Стојанче Стоилов - капитен на Вардар

"Загреб е една од екипите која најдобро ја познаваме, заедно сме во СЕХА лигата од самото формирање. Тие имаат тренер кој одлично нè познава, но и ние него. Натпреварот ќе биде динамичен и борбен. ППД Загреб е квалитетна и незгодна екипа, тоа го потврдија и минатата сезона во СЕХА лигата и Лигата на шампионите. Ако ја повториме играта против Веспрем можеме да очекуваме позитивен резултат"

Веселин Вујовиќ - тренер на ППД Загреб

"Вардар одигра необични натпревари со Мешков и Металург, но со Веспрем одиграа импресивно, доминантна победа против можеби најдобриот тим во Европа, и покажаа дека се опасни и сериозен тим. И како домаќини сега се фаворити, а ние ќе играме без Домагој Павловиќ и Лука Шебетиќ, за да бидеме комплетни и во форма каква јас посакувам. Ќе биде добар натпревар и Загреб ќе покаже дека се сериозен тим иако без неколку повредени играчи, но очекувам да покажеме добра игра, па ако може и да победиме.

Стефан Вујиќ - играч на ППД Загреб

Пред нас е тежок натпревар со многу серозен и квалитетен ривал. Со новите играчи, Вардар ги најави своите идни амбиции и утре нема да биде лесно. Нашата цел е да победиме, да дадеме се од себе, па на крајот резултатот ќе покаже кој е подобар. Јас не бев изненаден од победата на Вардар против Веспрем, но гол разликата беше неочекувана. Очекував потензичен натпревар, но на крај Вардар слaвеше со седум гол. Тоа беше изненадување за многумина.