Единствената дилемата на натпреварот беше само со колкава гол разлика ќе заврши мечот во корист на Вардар, чиј тим иако беше без петмина стандардни првотимци немаше проблеми да го победи Раднички со 39-31 (21-14) во рамките на СЕХА лигата. За актуелниот освојувач на Регионалната лига ова е шеста победа во последните седум одиграни натпревари (три во СЕХА лигата и четири во ЛШ) и шести триумф сезонава во СЕХА лигата.

Тренерот Раул Гонзалез реши да одмора неколку првотимци, па на трибините останаа Штербик, Душебаев, Шишкарев, Горбок и Марковиќ. Шанса повеќе да играат добија Лазаров, Растворцев, Јовчевски, Недановски и Терзиќ. Секој се обидуваше да се наметне кај тренерот, а тој сакаше да има што повеќе разиграни ракометари, гладни за докажување кои се борат за место во тимот.

Гостите поведоа само на почетокот со 1-0, а потоа доминација, диктирање на темпото беше целосно под контрола на домаќините. Разликата се зголемуваше, а единствено што Раднички успеваше да стори, е да направи серија од 1-2 гола, или најмногу три за да се приближи резултатски, колку-толку. И повторно вардарци додаваа гас, и правеа нова разлика. Кога во 26 минута Раднички намали на 16-13, се понадеваа гостите од Крагуевац дека можеби можат да се врата во игра. Тогаш следуваше серија од 5-1 и водство од 21-14 со кое се замина на одмор.

Дуелот со Раднички беше како добра увертира за Вардар пред средбата во петок против Татран Прешов исто така во СЕХА лигата

Небојша Недељковиќ - тренер на Раднички

Вардар е меѓу петте најголемите пет клубови во Европа во моментов, и е кандидат за Ф4 турнирот во Келн. Тоа и го заслужува според квалитетот. Мојот колега Гонзалез успешно ја води екипата. Ние ќе навиваме со срце за нив, имаме многу пријатели тука и ќе ни биде драго да стигнат до Ф4.

Ние со страв дојдовме тука и со респект кон ривалот. Ние сме нови во СЕХА лигата и играме подобро од натпревар во натпревар. Доживеавме дебакл против Металург на првото доаѓање во Скопје, но сега игравме подобро. Ниту денеска не игравме лошо, колку што ни дозволи ривалот. Не сум задоволен од почетокот на првото полувреме и на почеток на вториот дел.

Александар Босиќ - играч на Раднички

Дојдовме да се надигруваме. Беше интересен натпревар со многу постигнати голови. Сакавме да ги исправиме грешки кои ги правевме на претходните натпревари. Голема разлика е во квалитетот е меѓу нас и Вардар. Му честитам на Вардар и им посакувам среќа во следните натпревари.

Раул Гонзалез - тренер на Вардар

Задоволен сум од победата, освоени се три бода. Пласман на Ф4 е целта, тоа е кажано уште на почетокот на сезоната. Дома играме полесно, отколку во гости. Раднички игра добро во гости, а тоа го покажаа и во Брест. Играат брз ракомет и имаат добри играчи. Ние бевме уморни, имавме три силни натпревари за краток период.

Стефан Терзиќ - играч на Вардар

Ние добро трчавме, и имавме серија од 4-0 на самиот почеток и тука се одвоивме. Потоа малку застанавме, и снемавме и сила. Трите бодови се освоени, а добро е што тренерот ни даде повеќе шанса на повеќемина и го чекаме со нетрпение натпреварот во петок со Татран.