Двата клуба имаат серија од победи во СЕХА ГСС лигата, и во 8 коло, играат меѓусебе во Скопје (петок, 24 октомври 2014). Домаќинот, Вардар има три победи по ред во Регионалната лига, а Татран доаѓа со серија од четири победи по ред.

Пред да добијат две недели одмор, до следниот натпревар, и Вардар и Татран се надеваат дека ќе ја продолжат серијата на победи. За Вардар завршува една серија на тешки натпревари во ЕХФ Лигата на шампионите, а оваа седмица треба да одиграа три натпревари. Во средата во Скопје го победија Раднички, и после еден ден одмор треба да одиграат уште еден натпревар, со Татран.

Словачкиот првак отсекогаш бил незгоден ривал за македонските екипи, особено на натпреварите што се играат во Скопје. Овојпат Вардар е фаворит, а токму таквата улога на домаќинот, Татран сака да ја искористи и да се обиде да освои бодови.

Во меѓусебните натпревари досега во СЕХА ГСС лигата, Вардар и Татран играле шестпати, Вардар победил двапати, еден натпревар завршил реми, а трипати победиле гостите од Прешов. Ланската сезона, Татран победи на гостувањето во Скопје, 37-34, а на реваншот во Прешов беше 29-27 за Вардар.

На овој натпревар, во тимот на Вардар сигурно нема да бидат Алекс Душебаев и Добривоје Марковиќ, поради повреда. Кои играчи ќе бидат во тимот ќе се знае по последниот тренинг, бидејќи во средата Вардар одигра натпревар против Раднички, па тренерот Гонзалез ќе почека да ја види ситуацијата со повредите и уморот.

Раул Гозалез - тренер на Вардар

"Играме против Татран Прешов, екипа која има силна одбрана и добри шутери. Ова е за нас трет натпревар оваа недела, малку сме уморни, но сепак мора да направиме сѐ за да го добиеме овој меч. Овие три бода ни се важни за да останеме на врвот во СЕХА-лигата и да се пласираме на фајанлфор."

Филип Лазаров - играч на Вардар

"Ќе биде напорно, Татран Прешов е далеку посериозна екипа од Раднички, претендент е за место во фајналфор, знаела и да изненади овде во Скопје, така што мораме да го одиграме максимално овој натпревар и да извојуваме победа. Со тоа ќе затвориме една успешна недела и еден успешен почеток во СЕХА-лигата, со исклучок на поразот од Веспрем. На добар пат сме за фајналфорот.

Петер Давид - тренер на Татран

"Јасно е дека Вардар е голем фаворит на овој натпревар пред домашна публика. Како и да е патуваме во Скопје со мала доза на самодоверба бидејќи имаме серија од 12 победи по ред и ќе се обидеме таа да продолжи. Се надевам ова ќе биде убав натпревар".

Јакуб Хрстка - играч на Татран 

Нашите последни настапи во првенството на Словачка и последните четири натпревари во СЕХА лигата предвидуваат дека можеме да освоиме некој бод во Скопје, но се ќе зависи од нашата концентрација и исполнувањето на насоките на тренерот.