По победата во македонското дерби, Вардар има уште еден натпревар од СЕХА ГСС лигата во Скопје, но сега како голем фаворит против Борац од Бања Лка. Играчите и онака беа уморни од напорните мечеви во Лигата на шампионите, а сега по само два дена од мечот со Металург тренерот Раул Гонзалес мора да го најде вистинскиот баланс како да ги одмори и истовремено да го извлече најдоброто од нив.

Борац има само четири бода на 9. место на табелата, но во неколку меча оваа сезона покажа дека знае да се носи со големи противници. Првиот натпревар меѓу овие две екипи заврши 31-22 за Вардар, така што домашните играчи и навивачи се надеваат дека нешто слично ќе се случува и в сабота, од 20:15 часот. Вардар има 24 поени на второто место на табелата, но со уште една победа би се издвоил од ППД Загреб (кој има исто така 24 поени) и би дошол поблиску до лидерот Веспрем со 30 бода.

Игор Карачиќ би можел да се врати за натпреварот против Борац, но Раул Гонзалес сѐ уште не решил на кои ракометари ќе им даде шанса да играат.

Раул Гонзалес, тренер на Вардар:

Нѐ очекува уште еден меч во СЕХА, ова е последен натпревар на домашен терен за оваа година и затоа мора да биде добар натпревар. Борац има само четири бода, но и покрај тоа игра подобро околку бодовите што ги има. Имаат добар пикер, Николиќ, Обрадовиќ е добар на бековската позиција. Ќе биде грешка ако ги потцениме. Ние можеби сега играме добро, но ништо не е гаранција дека ќе победиме без да одиграме како што треба. Се наоѓаме во одлична позиција во СЕХА-лигата во моментов, но овие три бода ќе ни бидат потребни пред гостувањето кај Нексе каде што ќе ни биде потешко.

Стефан Терзиќ, играч на Вардар:

Борац е екипа која има одличен спој на младост и искуство, Николиќ на Пикер, Тривунџа и Обрадовиќ на бек. Сигурен сум дека ќе победиме пред нашата публика, а потоа да ја завршиме оваа 2014 година со победа против Нексе и со мирни глави да одиме на зимска пауза. Борац е екипа која не треба да се потцени. Во Бања Лука отсекогаш се играло добар ракомет, дел од моите почетоци и јас ги минав таму и затоа знам дека не смееме да се опуштиме.

Игор Раѓеновиќ, тренер на Борац:

Во Скопје патуваме заморни од натпреварот со Мешков Брест, но сепак не сме под притисок. Екипата на Вардар е апсолутен фаворит, но, ние ќе се потрудиме да одиграме што е можно подобро. Ова ќе биде екипа каде ќе им дадеме шанса на младите играчи. Тоа е одлична прилика и тие да почувствуваат како изгледа СЕХА лигата.

Мирко Микиќ, играч на Борац:

Одиме на гостување кај Вардар, која е една од најдобрите екипи во Европа, а не само во СЕХА лигата. Токму затоа во Скопје заминуваме растоварени од големи амбиции. Ќе одиграме најдобро што можеме и ќе дадеме се од себе натпреварот да биде добар.