Вардар и Веспрем во сабота (20,15 ч.) ќе го играат последниот натпревар во регуларниот дел од сезоната во СЕХА лигата, натпревар што треба да биде шлагворт за сите ракометни вљубеници.

Натпревар што нема резултатско значење, и ќе донесе многу дуели, атрактивни потези кои ќе значат престиж во меѓусебните мечеви. Вардар во полуфиналето на Ф4 влегува од втората позиција, а Веспрем е единствениот тим сезонава во СЕХА лигата што нема загубено бодови. Токму, тоа е предизвикот за играчите на Вардар, да бидат првиот тим сезонава во СЕХА што успеале да му земат бодови на унгарскиот првак.

Тренерот на Вардар, Раул Гонзалез најави дека составот со кој ќе настапи ќе се знае по последниот тренинг, со оглед на можноста Тоскиќ и Абутовиќ да не тренираат со полна пареа, а истото се однесува и за Растворцев и Чипурин.

Сезонава во сите три натпревари меѓу Вардар и Веспрем, унгарскиот првак излегуваше на крајот како победник. Двапати во групната фаза од ЛШ, и еднаш во СЕХА лигата. Сега Вардар ја гледа шансата за реванш

Наместо тренинг пред одигрување на натпреварот со Вардар, ракометарите на Веспрем решија да играат пријателски меч со тимот на Тинекс Пролет, екипа од Скопје, со која имаа пријателски врски.

Раул Гонзалез - тренер на Вардар

"Ние сме на второто место во СЕХА лигата. Нема притисок за овој меч. Многу важен, не толку од натпреварувачки аспект, затоа што не можеме да бидеме ниту први, ниту трети. Ја завршивме нашата работата во Прешов кога го победивме Татран. Добро е што немаме многу повредени играчи. Затоа и можеме порелаксирано да играме. Да се подготвиме за мечот во ЛШ против Висла. Тоа е основната цел. Ќе се обидеме да им дадеме шанса на сите, да уживаат во овој меч и да не ризикуваме".

Стојанче Стоилов - играч на Вардар

"Ова е меч без притисок. Вардар е Вардар, играме дома и сакаме да победиме. Веспрем ни е должник, трипати не победија, еднаш несреќно. Се надевам дека сега ќе победиме ние"

Карлос Ортега - тренер на Веспрем

Ова ќе биде интересен натпревар, првиот против вториот, најдобрите две екипи во СЕХА лигата сезонава. Бодовите не се важни за тимовите, бидејќи ние сме први, а тие секако се второпласирани. Натпреварите меѓу Вардар и Веспрем секогаш се добри. Ќе видиме, можеби во главите на играчите веќе се осминафиналните мечеви од ЕХФ лигата на шампионите, но, секако двата тима сакаат да победат и ова ќе биде интересен меч за навивачите.

Момир Илиќ - играч на Веспрем

Ова ќе биде последен меч пред играњето на Ф4 турнирот на СЕХА лигата. Ние секако сме први, но одиме во Скопје да се бориме, бидејќи секој натпревар е голем предизвик за нас, и ќе се обидеме да дадеме се од себе и да победиме. Секако Вардар е одличен тим и ќе играат пред домашните навивачи. Ова ќе биде четврти дуел на овие тимови сезонава. Ние успеавме да победиме на сите три натпревари досега, и се надевам тоа повторно ќе се случи.