По четири сезони владеење на Вардар и на Металург, првпат во СЕХА лигата како претставник од Македонија ќе биде тимот на Макс Струмица. Актуелните македонски вице-прваци во својот дебитантски настап, сезоната ќе ја отворат пред домашна публика со дуел против Војводина (31 август, 17,45 ч.)

Очекувањата на домаќините се триумф со кој би докажале дека имаат сила да играат во СЕХА лигата. Искуството што го имаат од пред две сезони кога настапуваа во групната фаза од ЕХФ купот сега треба да го искористат и на овие натпревари. Тимот што лани заврши како втор во Македонија, се засили со неколку ракометари. На подготвителните натпревари Макс Струмица одигра променливо, беа четвртопласирани на турнирот во Струга, а победија во контролните натпревари со Радовиш и Пелистер.

Екипата на трумица се надева дека ќе го искористи фактот што Војводина се подготвува за настап во Ц групата од ЕХФ лигата на шампионите на 19 септември против Мешков. Српскиот тим сега ја темпира формата за тој период и ова ќе му бодат вистински проверки за моментната форма.

Војводина сезоната ја почнува со две гостувања во Македонија. Прво со Макс Струмица, а два дена подоцна му гостува на Вардар.

Марјан Андонов - тренер на Макс Струмица

Самото учество на Струмица во СЕХА лигата е голема работа за нас. За нас ова е прв натпревар, и секогаш имаме желба на почеток да победиме. Војводина е слична со квалитет како нас, но поискусни во ова натпреварување. Се надевам дека ќе ги исполниме сите задачи, а нека победи подобриот.

Игор Милосављевиќ - играч на Макс Струмица

Војводина доаѓа со изменет состав од минатата година, но максимално го цениме и почитуваме српскиот првак, и сметам дека за утрешниот натпревар, се освен победа за нас би било неуспех. Имаме одлична екипа, подготвени сме, и го чекаме утрешниот натпревар и можам да кажам дека со играта и резултатите ќе покажеме дека заслужуваме да играме во СЕХА лигата.

Никола Марковиќ - тренер на Војводина

Наш приоритет на гостувањето во Македонија нема да биде резултатот, бидејќи сакаме да бидеме во топ форма кон крајот на септември кога маме натпревар во ЕХФ лигата на шампионите. Секако имаме почитување кон Макс Струмица иако се дебитанти во СЕХА лигата. Ќе видиме дали уште од сега можеме да го примениме она што го работевме на подготовките.

Данимир Ќурковиќ - играч на Војводина

Возбудени сме поради почетокот на новата сезона во СЕХА лигата. Тоа е извонредно натпреварување која постојано напредува. Секогаш е предизвик да се игра во Македонија. Макс Струмица како дебитант сигурно ќе има мотив повеќе да се докаже.