По освојувањето на турнирите во Кањижа и Скопје, сега ракометарите на Вардар ги почнуваат "вистинските натпревари" во СЕХА Газпром лигата каде се борат за бодови, и повторување на ланскиот успех, пласман на Ф4 турнирот. Српскиот првак Војводина е првиот ривал на Вардар во СЕХА лигата.

Војводина одигра нерешено 25-25 со Макс Струмица на првиот натпревар во новата сезона. Тимот од Нови Сад секогаш играл добро кога гостувал во Македонија, но со оглед на формата во која се наоѓаат "црвено-црните" тие се фаворити на дуелот. Војводина е вторпат по ред шампион на Србија и редовно тврд противник, без разлика што завршува во долната половина од СЕХА-табелата. Минатата сезона Вардар двапати ја победи, но со скромни 30-26 и 26-21, затоа вниманието ќе биде на високо ниво.

Поради повреда на грбот во составот на Вардар веројатно ќе го нема голманот Петар Ангелов, кој доби препорака од лекарите да мирува уште неколку дена, а на стомачни болки се пожалил и Матјаж Брумен. Во зависност од неговата здравствена состојба утре ќе се реши дали ќе биде во екипата за средбата со Војводина.

Раул Гонзалез, тренер на Вардар:

Почнуваме нова сезона во СЕХА Газпром лигата. Јас сум задоволен со подготовките што ги имавме. Работевме многу добро во претходниот период и одигравме контролни натпревари каде победувавме. На сите натпревари досега игравме добро, и се надевам дека оваа сезона ќе биде подобра од лани. Имаме проблеми со повредите на Ангелов, а Брумен имаше зголемена температура. Ќе видиме како ќе биде утре и кои ќе биде во составот.

Против Војводина ќе мораме да играме добро во напад, зашто тие имаат добри центри и се брзи во контра. Добро е што ќе имаме силни натпревари пред дуелот со Монпелје, и сакаме да одиме чекор по чекор.

Филип Лазаров, играч на Вардар:

Ова е официјален старт на новата сезона против Војводина. Нормално е на сите натпревари на домашен терен да одиме на победа, па така ќе биде и утре. Ја гледавме Војводина на првиот меч со Струмица. Сите екипи се желни за докажување, особено на самиот почеток од сезоната. Треба да бидеме претпазливи, и во ритам во кој игравме досега. Се надевам дека уште долго време ќе имаме добри резултати.

Никола Марковиќ, тренер на Војводина:

Според мене, Вардар е меѓу четирите најдобри екипи во Европа. Нам ни претстои многу тежок натпревар. Веднаш по натпреварот против Макс Струмица заминуваме за Скопје. Имаме само еден ден за одмор. Ќе видиме дали ќе имаме измени во екипата. Наш приоритет не е резултат, туку подобрување на формата пред натпреварите во Лигата на шампионите.

Зоран Николиќ, играч на Војводина:

Голем е предизвикот да се игра против Вардар. Тоа е врвна екипа. Ќе дадеме се од себе. Ќе се бориме, но мораме да бидеме реални. Вардар е апсолутен фаворит.