Македонскиот првак на убедлив и доминантен начин ја почна сезоната во СЕХА Газпром лигата со "лесен" триумф против Војводина, 37-27 (18-8), пред се благодарение на извонредното прво полувреме.

Голманот Арпад Штербик беше виновникот за десетте гола предност на "црвено-црните", бидејќи тој имаше вкупно 16 одбрани, двојно повеќе отколку што голови постигнаа играчите на Војводина. Тоа беше клучниот период, кога се беше решено. Штербик имаше 16 одбрани од 24 упатени топки, а Вардар реализираше 18 од вкупмп 24 напади.

Одбраната на Вардар делуваше непробојно со зона 5-1, со Дибиров, или Манасков како истурен играч напред, а одзади се чувствува новата сигурност која ја носат корпулентните Марсениќ, или Македа, без разлика кој добива шанса. Војводина се држеше само во првите 10 минути, дури и водеше о 4-3 дотогаш, но затоа во следните 10 минути постигна само два гола, а прими девет гола.

Во вториот дел шанса на голот доби Градимир Чаневски и веднаш се почувствува разликата, иако и тој беше натпросечен и до крајот на мечот собра осум одбрани. Сепак, предноста на Вардар од највисоки 11 разлика (24-13 и 25-14), падна на 30-24 во 51. Минута. Тренерот на Вардар, Раул Гонзалес менуваше, комбинираше и експериментираше и ги разигра сите во отсуство на Блаженко Лацковиќ, Матјаж Брумен и Петар Ангелов.

Најдобра шутерска вечер имаа крилата, Тимур Дибиров кој постигна шест гола, Дејан Манасков даде, а Данил Шишкарев реализираше четири пати. Кај Војводина, Милош Обровиќ постигна осум гола.

Следниот предизвик за Вардар е Макс Струмица, в сабота во Скопје, а Војводина во недела е домаќин на Нексе.

Раул Гонзалез - тренер на Вардар

Војводина играше добро, имаат добар тренер и добар тим. Игравме одлично во првото полувреме, а Арпад беше одличен. Имавме 5-1 зона и добар контра напад. Сепак потоа во вториот дел имавме малку проблеми. Пробавме да смениме играчи, сменивме и зона 6-0, но не одигравме како што сакаме.

Лука Циндирќ - играч на Вардар

Драго ми е што отворивме добро, иако кон крајот на натпреварот Војводина го покажа своето лице. Нам ни останува да продолжиме во ова темпо и да ја креваме формата за Лигата на шампионите.

Никола Марковиќ - тренер на Војводина

Мислам дека за Вардар овој натпревар беше еден полесен тренинг, што ни преставува чест. Јас имав идеја да почнеме со една комбинирана постава во вака убав амбиент, надевајќи се дека ако можат да се носат со Вардар и да му даваат голови на Арпад Штербик тогаш сигурно ќе можат против другите. Сепак се виде дека имаме проблеми, а овој распоред е напорен, имаме натпревари во ритам сабота - среда - сабота - среда, а ние имаме 16 играчи и мора сите да бидат максимално подготвени.

Милош Орбовиќ - играч на Војводина

Му честитам на Вардар за победата, покажаа дека се едни од најдобрите во Европа. Имаме тежок распоред, прво турнир во Добој, па во Струмица, но дадовме максимум и ете, тоа беше резултатот и уште еднаш покажаа дека се класа.

Photo Gallery