Нексе ќе чека шанса, домаќините претпазливи иако се фаворити

Гостувањата на Нексе во Скопје секогаш носеле неизвесност во СЕХА Газпром лигата, па иако на утрешниот натпревар Вардар е фаворит (20,15 ч.), домаќините предупредуваат на претпазливост.

Нексе доаѓа во Скопје по триумфот над Војводина во Нови Сад, и свесни се дека сега ќе имаа тежок предизвик. Сезонава двата тима одиграа еден натпревар, на крајот од август на "Турнир Вардар 2015" каде победија домаќините со 36-26, и тоа пред се поради одличното прво полувреме.

Тимот од Нашице покажа дека е во добра форма и на претходниот натпревар во СЕХА лигата против ППД Загреб кога на пет минути до крај имаа водство, а потоа поради сопствените грешки му дозволија на ривалот да триумфира. Во Скопје доаѓаат со единствена намера добро да се спротивстават и ако им се укаже шанса да ја искористат.

Лани во СЕХА лигата на првиот натпревар во Скопје, Вардар победи со 32-21, а во реваншот во Нашице, повторно победи Вардар, овојпат со 30-27. На досегашните осум меѓусебни натпревари во СЕХА Газпром лигата, само еднаш Нексе успеал да победи и тоа на домашен терен, 32-25 во сезоната 2013/2014.

За Вардар овие први натпревари во СЕХА лигата се воигрување за настапот во Лигата на шампионите, каде на 20 септември гостува во Франција кај Монпелје. Затоа "црвено-црните" сакаат да ја продолжат триумфалната низа и да го задржат победничкиот менталитет. Ова е особено важно за новите играчи кои веќе се вклопуваат во системот на работа на Вардар.

На овој дуел со Нексе, тренерот Раул Гонзалез нема да смета на Александар Деревен, Филип Лазаров и Петар Ангелов, и тоа сите поради повреди. Деревен се жали на скочниот зглоб, Лазаров на коленото, а Ангелов има проблеми со грбот. Во тимот се враќа Алекс Душебаев кој паузираше една недела.

Раул Гонзалез - тренер на Вардар

Имаме проблеми со повреди на Лазаров и на Деревен. Александар Деревен има проблем со скочниот зглоб, а Лазаров со коленото, и нема да играат со сигурност. Игравме пред неколку недели со Нексе, и имавме проблеми во вториот дел. Нексе игра се подобро. Сакаме да ја подобриме играта, и имаме уште малку време до натпреварот со Монпелје, и треба да бидеме подготвени за тој меч. Сакам да им дадеме шанса на сите играчи. Нексе игра добро 6-0 и 5-1 одбрана, играат силно во одбрана и брзи се во играта.

Блаженко Лацковиќ - играч на Вардар

Тоа е екипа која со Загреб имаше шанса да победи, но загуби на крај. Покажаа добар квалитет, подобро од она што го покажаа во Скопје. Ќе треба сериозно да се сфати тој натпревар. Прво, бидејќи имаме проблеми со повредите, а второ да се продолжи победничкиот менталитет. Ни доаѓа потоа Монпелје, па треба сите играчи да ја почувствуваат таа победничка атмосфера. Утре ќе се обидеме да ја пробаме и таа 6-0 одбрана, и да играме подобро.

Зденко Корди - тренер на Нексе

Вардар е фаворит, не само на овој натпревар против нас. Тие се тим на највисоко европско ниво. Ќе бидат голем мотив и предизвик за нас. Ќе биде интересно да се вди колку сме подготвени и што можеме да направиме по двата тешки натпревари во Загреб и Нови Сад. Играчите ќе добијат некои специјални задачи и ќе видиме како ќе одговорат на тоа.

Јосип Бозиќ - Павлетиќ - играч на Нексе

Доаѓаме во Скопје директно од Нови Сад, и ќе играме два натпревари за три дена. Вардар е силен тим, еден од најдобрите во Европа. Мораме да се бориме и да го дадеме максимумот. Тоа е единствен начин како да се игра против квалитетен тим како што е Вардар. Ќе ја чекаме нашата шанса и ако се укаже ќе обидеме да ја искористиме.