Ракометарите на Борац можат само да жалат за пропуштената шанса да се вратат со победа од Струмица, а домаќините со голот на Јовица Младеновски во последната секунда израмнија на 30-30. Вторпат сезонава Макс Струмица игра ваков неизвесен натпревар, а слично беше во првото коло кога примија гол во последната секунда на мечот со Војводина.

Двете екипи остануваа на последните две места на табелата. Макс Струмица има два бода од шест одиграни натпревари, а Борац го освои првиот бод сезонава во вториот натпревар.

На три минути до крај на средбата Борац имаше водство од 30-27 и многумина мислеа дека гостите на крајот ќе се радуваат. Но, Александар Босеовски постигна два гола по ред. Последните 15 секунди во напад беше Борац. На тајм аут се договорија како да играат, но само што тргнаа, после неколку секунди ја загубија топката. Стефан Чизмовиќ го пронајде Јовица Младеновски во нападот кој погоди во последната секунда.

За разлика од првото полувреме каде беше неизвесно, во второто полувреме Борац успеа да се одлепи резултатски на 2-3 гола, но Макс Струмица секогаш возвраќаше.

Крилото Реваз Чантурија постигна 13 гола за Макс Струмица, а Даворин Вујовиќ постигна шест гола за Борац.

 

Марјан Андонов - тренер на Макс Струмица

Очекувавме неизвесен натпревар. Ние и Борац се рамноправни тимови. Реков дека ќе победи онаа екипа што ќе направи помалку грешки. Ние имавме многу грешки во играта, и одбиените топките се враќаа кај противникот. На крај добивме, тие водеа со три гола, но спорт е спорт, и се игра до крај. Очекував од екипата по двата слаби резултати да се врати во живот, и задоволен сум во мала рака од прикажаното.

Стефан Чизмовиќ - играч на Макс Струмица

Беше интересен натпревар, пред се резултатски. И тие, и ние водевме. Тие во последните 15 секунди не беа концентрирани, јас успеав да ја одземам топката и ја имавме таа среќа да постигнеме гол во последни секунди. Тоа ние го доживеавме на дуелот со Војводина, и знам како се чувствуваат. Задоволен сум со резултатот, ова  е голем бод.

Александар Меѓедовиќ - тренер на Борац

Имавме контрола над резултатот во главно во второто полувреме. Со некои грешки и им овозможивме да освојат бод. Не се предаваа до крај

Борис Шекариќ - играч на Борац

Очекувавме тежок натпревар, особено по двата порази на Струмица. Имавме на две минути пред крај предност од три гола. Не знам што се случи. Имавме 15 секунди и тајм аут, но не успеавме.

Photo Gallery