Традиционално Татран Прешов играл добро и освојувал бодови на натпреварите против Вардар во Скопје, во рамките од СЕХА Газпром лигата. Од четири досега одиграни натпревари во Скопје, Татран двапати победувал. Сега гостите доаѓаат со период кога имаат проблеми со повреди на играчи, и по пораз од 20-30 во ЕХФ Лигата на шампионите на домашен терен од Мешков. На овој натпревар фаворит е Вардар.

По напорниот натпревар во ЕХФ лигата на шампионите, против Пик Сегед и победата од 28-24, сега тренерот на Вардар веројатно ќе прави измени во ростерот со цел да одмори дел од ракометарите.

По три одиграни натпревари во СЕХА Газпром лигата двете екипи имаат максимален учинок, и по девет бода. Словачкиот тим досега двапати победуваше на гостински терен сезонава.

Вардар и Татран во СЕХА Газпром лигата одиграле вкупно осум натпревари, на кои четирипати победувал Вардар, трипати победувал Татран и само еден натпревар завршил со реми. Интересно е што двапати Татран се враќал дома со победа од Скопје, и тоа во сезоните 2012/2013 (37-34) и 2013/2014 (33-29). Лани на двата одиграни натпревари победуваше Вардар (32-26 и 34-29).

Татран има проблеми со повредите, а на листата се шестмина бекови чие играње е неизвесно на натпреварот во Скопје.

Раул Гонзалез - тренер на Вардар

Имаме само еден ден за да се подготвиме овој натпревар. Не знам како ќе бидат играчите зашто вчера имавме тежок натпревар, ќе имаме потешкотии со повредени, ќе видиме на попладневниот тренинг. Сега може да не чувствуваат ништо, но кога ќе почнат да тренираат ќе знам каква е ситуацијата и утре ќе решам кои ќе играат. Ако победиме ќе бидеме прво место и во СЕХА и во ЛШ и тоа би било одлично Во моментов и Татран има девет бода како нас. Секогаш ги почитуваме многу сите екипи и за нас ќе биде проблематично на овој натпревар. Татран употребува одбрана 5-1, 3-3, а ние не играме добро против тие одбрани. Се покажа и вчера со ПИК Сегед, затоа против Татран мора да се подобриме против таквата одбрана

Страхиња Милиќ - играч на Вардар

Не се заморуваме со густиот распоред, добро ни доаѓаат овие натпревари, за да се воиграме. Кога би играле само македонско првенство не би имале така силни натпревари. Затоа СЕХА лигата е добра за нас, ни овозоможува да ја држиме формата и да бидеме поподготвени во Лигата на шампионите. Татран е противник за респект. Секако дека ќе влеземе во натпреварот максимално мотивирани и се надевам дека резултатот ќе биде на нашата страна"

Растислав Тртик - тренер на Татран

Знаме дека одиме на тежок натпревар во вторник навечер во Скопје. Тимот е ослабен со повреда на шест играчи (Рабек, Крок, Погањ, Фурлан, Урбан и Ивковиќ) и ќе мораме да размислиме некоја тактика за играње. Вардар е многу квалитетен тим со одлични играчи, и верувам ќе играме убав меч без да имаме некоја друга повреда во тимот.

Ричард Вилга - играч на Татран

Во ситуација кога имаме шест повредени играчи, јас сум благодарен што тренерот ми дава шанса да играм на натпреварот против така извонреден тим како Вардар. Ќе се обидам да дадам се од себе и првенствено да не го разочарам тренерот, и второ да го задржиме високотo темпо и против Вардар. Верувам ова ќе биде убав натпревар.