Од самиот почеток на СЕХА Газпром лигата дуелите меѓу Вардар и ППД Загреб им интересни, неизвесни и често решавале за титули. Овојпат во "СЕХА класико" гостувањето на ППД Загреб во СЦ "Јане Сандански" ќе биде во знакот на домаќините кои се фаворити, а гостите доаѓаат без седум стандардни играчи.

Двата тима претендираат да бидат дел од Ф4 турнирот на СЕХА Газпром лигата, но се посакува едно од првите две места со што директно би се пласирале во полуфиналето. Првиот натпревар во средината на октомври во Загреб заврши со триумф на хрватскиот првак кој победи со 30-25. ППД Загреб има два бода повеќе од Вардар, но и меч помалку.

ППД Загреб се надева на продолжување на победничката серија во СЕХА Газпром лигата, по трите победи по ред, што би било добра увертира и за уште едно дерби со Веспрем на 16 декември. За дуелот со Вардар, тренерот на ППД Загреб, Веселин Вујовиќ нема да може да смета на повредените Стипе Мандалиниќ, Лука Степанчиќ, Лука Шебетиќ, Леон Шушња, Јосип Шандрк и Јосип Валчиќ, а нема да биде во составот ниту Ловро Михиќ. На првата екипа и се приклучи левиот бек Јаков Врдољак (19) од јуниорскиот тим, а деби ќе има и Велко Маркоски кој дојде од тимот на Работнички.

Вардар ќе игра без Игор Карачиќ кој има повреда на коленото, па составот ќе биде ист како на дуелот со Колдинг во ЕХФ лигата на шампионите. Ова за Вардар ќе биде добра проверка пред следното гостување во Прешов кај Татран, иако на пат за Словачка ќе мора да одигра и дуел со Војводина. Македонскиот првак е единствен што досега му зема бод на Веспрем, но и неочекувано дома загуби од Мешков. За остварување на цела пласман на првите две места ќе треба да победи на четирите натпревари во следните седум дена.

Раул Гонзалез, тренер на Вардар:

Ако сакаме да играме на Ф4 мораме да победиме со Загреб. Сега сме на трето место и со победа би биле второпласирани. Треба да играме добро во одбрана, како на натпреварот со Колдинг. Загреб има добри млади играчи, но и неколку искусни. Ќе мораме да ги користиме шансите, бидејќи Загреб знае многу бргу да казнува во контранапади. Карачиќ нема да игра, има повреда на коленото, а другите играчи ќе бидат истите што беа и против Колдинг. Можеби и Ангелов ќе брани, но играчите остануваат исти"

Филип Лазаров, играч на Вардар:

Го дочекуваме натпреварот во добра атмосфера по Колдинг, ни доаѓа реномиран противник кој е големо име на Балканот. На тренерска позиција е Вујовиќ кој беше во Вардар, а има и играчи како Добривоје Марковиќ и Велко Маркоски кои играле тука. Се очекува добар натпревар, што е добар предизвик за нашите навивачи да дојдат да го следат натпреварот,

Веселин Вујовиќ, тренер на ППД Загреб:

Ако зборуваме хипотетски и на хартија, тогаш Вардар е апсолутен фаворит. Нам ни недостасуваат голем број на стандардни играчи и иако некои и би можеле да играат, не верувам дека тоа нештo би променило во моментов против македонскиот првак, и решив да не рескирам се уште со оние кои што не се доволно подготвени. Како и да гледаш, Вардар е фаворит, но и Висла беше и уште некои други тимови, па на сите им покажавме дека можеме и знаеме да се бориме, и токму тоа ќе го направиме и во Скопје. Ќе водиме и некои помлади ракометари, кои во зависност од ситуацијата ќе добијат одредена минутажа на тој натпревар. На оваа турнеја во Македонија одиме да уживаме и знаеме дека императив за победа е оној втор натпревар со Макс Струмица, но зошто да не се обидеме да го изненадиме и Вардар.

Златко Хорват, играч на ППД Загреб:

Очекувам да играме како на мечот против Висла, да играме цврсто во одбрана и што подолго да бидеме рамноправни. Вардар е фаворит, но сметам дека шансите да изненадиме ни растат ако доволно долго го држиме резултатот во егал. Првенствено би бил задоволен со наша добра игра во одбрана, со сериозен пристап каде нема да му дозволиме на противникот да постигнува лесни голови. Нивната најсилна странa е добрата одбрана и неверојатниот Арпад Штербик на голот, и транзицијата во играта која им овозможува многу лесни голови, и токму така го победуваат противникот.