Во својата дебитантска сезона во СЕХА Газпром лигата екипата на Макс Струмица се уште нема победа, а тешко ќе биде да стигне до бодови и на следниот натпревар против ППД Загреб, чии ракометари се фаворити за утрешниот настап (18 ч).

Откако ППД Загреб загуби од Вардар, 24-33, ракометарите остануваат во Скопје да одиграат уште еден натпревар против вице првакот на Македонија. Овој натпревар ќе се игра со СРЦ Кале наместо во Струмица. Поради технички проблеми со светлото во салата во Струмица на кој се работи, и следниот натпревар од СЕХА Газпром лигата меѓу Макс Струмица и Спартак Војпут ќе се игра во Скопје.

На првиот меѓусебен натпревар на Макс Струмица и Загреб, хрватскиот тим победи со 42-13. Сега повторно се фаворити иако ќе бидат без седум ракометари кои се повредени. Од друга страна и Макс Струмица има проблеми со играчкиот кадар бидејќи некои играчи си заминаа, а некои се повредени.

Марјан Андонов, тренер на Макс Струмица:

Загреб е дел од оние 5 екипи кои доминираат во СЕХА Газпром лигата, и е апсолутен фаворит на овој натпревар, меѓутоа наше е да се покажеме во што подобро издание и секој натпревар е искуство плус за нас. Нема што многу да се анализира и зборува за ривалот. Се надевам на една добра и коректна игра и фер плеј

Борче Соколов , играч на Макс Струмица:

Секако дека е хендикеп што играме во Скопје, а не во Струмица, и ќе немаме поддршка од публиката. Се надеваме дека нема да се посрамотиме и ќе дадеме максимум од нас. Се надеваме на што поповолен резултат.

Веселин Вујовиќ, тренер на ППД Загреб:

Пред нас е натпревар со македонскиот вице првак Макс Струмица, и од мојата екипа очекувам да покаже карактер и во сериозен пристап да ја оправдаме улогата на фаворит и да се вратиме дома со три бода. Го респектираме противникот и знаеме дека натпреварот во Скопје нема да личи на оној од Загреб што го добивме со голема разлика. Сепак ние сме фаворити и ни останува да ја завршиме задачата и да победиме.

Лука Раковиќ, играч на ППД Загреб:

Мораме да заборавиме на лошата игра против Вардар и одиграме добро против Макс Струмица. Јасно е дека сме фаворити против Струмица. Тие во Загреб одмораа некои играчи, па сега верувам ќе бидат желни за докажување.